今日清晨六點幾起身返工，相約左一班同事係starbucks門口等。
當我行去starbucks嗰陣，見到我助手係到喊緊，我靜靜咁行埋去問左一句:『發生咩事?』
佢擰轉身，繼續用紙巾抹眼淚同喊，眼見佢咁樣，我都無再出聲，靜靜地企佢格離，聽住佢嗚咽。
我呆呆咁望向天空，今日好清涼，清早時分條街都無咩人，只剩得我地兩個。我依個助手平時好樂天同埋笑點好低，所以我經常哄佢笑黎拎啲自豪感，依一刻都係第一次見佢喊，腦海閃出一個念頭 " 丫!原來佢都會傷心，佢都會喊 "
諗起以前，試過有女仔係我面前喊，我即刻On9仔上身，盡量攪下爛GaG令佢笑返，總之佢肯笑，開心返就得。但依一刻我無咁做，都無再力氣咁做，因為我都唔係好得佢好多，同埋點解傷心一定要笑? 係咪笑左就代表問題已經解決?
諗起陳奕迅首開不了心
"不開心就不開心，也別勉強的慰問，但求藍調更興奮，逼我大笑情況更傷感
別要 不開心便找開心 去避過我的良心 "
我相信靜靜地由佢喊，已經足夠。我都唔勉強咁問佢發生咩事，至少佢肯講自然會講。
十分鐘後，一班同事遠處行埋黎，佢地充滿笑容，開心嘅樣一邊揮手一邊行過黎，我盡量將我眼神去表達比佢地聽 "佢喊緊"
點知，當佢地黎到我地身邊時，我助手即刻收起個喊樣，笑哂口咁同大家講早晨。
同事們:「嘩!你個鼻咁紅嘅?』
助手:「係呀!咁早好凍!鼻敏感發作!哈哈哈!」
後來成班開開心心咁出發返工，而我係背後望住我助手不禁暗嘆一句:「原來你都係同我一樣。」
真係可悲。
Search